Stop Muro deposita la fianza pa restablecer el doble sen

Abonada la caución de 47.958 euros solicitada pol Ayuntamientu

L’asociación ciudadana “Stop Muro” yá depositó énte’l xulgáu la fianza de 47.958 euros solicitada pa restablecer el doble sen na contornada d’El Muro de La Playa San Llorienzo semipeatonalizáu na pandemia.

El xulgáu de lo contencioso alministrativo númberu 1 de Xixón accedió’l 18 de mayu pasáu al pidimientu de “Stop Muro” d’executar provisionalmente la sentencia na que reclamaba restituyir el tráficu nos dos senes n’El Muro de La Playa San Llorienzo una vegada que fuera abonada la caución de 47.958 euros solicitada pol Ayuntamientu.

El presidente de “Stop Muro”, Manolo Robledo, esplicó que les donaciones y los bonos emitíos pola asociación nestes selmanes dexaron recaldar el dineru que yá se depositó na cuenta apurrida pol xugáu.

L’Ayuntamientu esplicó la selmana pasada que coles obres, que durarán un mes, va crease namás una carril de circulación sen oeste onde taba’l cascayu con un solo xiru a la izquierda en Menéndez Pelayo y caltendráse una llinia verde paralela dende la escalera 7 que se siguirá habilitando pa usu peatonal.

Robledo amosóse en desalcuerdu col asitiamientu que tendrá la carril bici, porque nun dirá pegada al pasu d’El Muro y podría xenerar inseguridá.

A xuiciu de so, la responsabilidá de cualquier accidente que pue pasar ye responsabilidá del Ayuntamientu pero non de “Stop Muro”, que lo único que pidió ye que la reforma seya "de la meyor manera" y de forma "barata y segura".​