Xornada pa visibilizar l'asturianu y reivindicar la so oficialidá

Día de la Llingua Asturiana na Feria de Muestres d'Asturies

Col envís de visibilizar l’asturianu y reivindicar la so oficialidá, Iniciativa pol Asturianu, en collaboración cola Cámara de Comerciu de Xixón, celebró güei’l primer Día de la Llingua Asturiana na Feria de Muestres.

A la cita reivindicativa asistieron diferentes representantes institucionales del ámbitu autonómicu y local, qu’aplaudieron la iniciativa de promover l’usu del asturianu nel eventu más multitudinariu d’Asturies.

La xornada arrancó colos pregoneros de L'Amuravela, Cesáreo Marqués, y el de La Regalina, José Manuel Menéndez y l’homenaxe a la figura de Xovellanos pola so contribución al caltenimientu del asturianu.

El programa d’actividaes inxertó charres, xuegos tradicionales, visites guiaes n’asturianu al Muséu del Pueblu d'Asturies​, poesía, teatru de títeres y acabó con una preba de sidra.​