Yolanda Díaz va axuntar con Adrián Barbón el día 30 n'Uviéu

L'equipu de Díaz niega'l discutiniu

Nun hai discutiniu. Ye lo qu'aseguren fontes del equipu de Yolanda Díaz tres la so visita d'ayeri a Asturies. Afiten que nun hai nengún problema col Gobiernu del Principáu y que prueba d'ello ye que Díaz va viaxar el día 30 a Uviéu p'axuntase con Adrián Barbón.

El presidente del Principáu aseguró ayeri sentise sorprendíu y defraudáu poles palabres de Díaz tres visitar a los trabayadores de Saint-Gobain. N'Avilés, la ministra de Trabayu llamentó nun poder axuntase con Barbón y pidió-y mayor implicación nel resolvimientu del conflictu.

En declaraciones a TPA, l'equipu de Díaz señala que lo único que quixo dicir ye que ye necesario que toles alministraciones remen xuntes. Na llinia del equipu de Díaz, Convocatoria por Asturies, sociu de Gobiernu, tamién quita importancia a lo socedío.

Pela so parte, el secretariu xeneral d'UXT n'Asturies, Javier Fernández Lanero, tamién quita fierro a les declaraciones ayeri de la Ministra de Trabayu, Yolanda Díaz, na so visita a Avilés. Asegura que tanto'l gobiernu d'Asturies como'l d'España tán trabayando na bona dirección pa solucionar el conflictu del zarru de Saint-Gobain.

El voceru del PP nel Congresu, de visita n’Asturies, considera llamentables les manifestaciones de Yolanda Díaz sobro la xestión de Barbón. Miguel Tellado acusó a Yolanda Díaz de nun proponer nenguna solución al zarru de Sekurit.