Adam Zagajewski, Premiu Princesa d'Asturies de les Lletres

Primer autor en llingua polaca qu'algama'l premiu

El poeta polacu Adam Zagajewski algamó güei n'Uviéu'l Premiu Princesa d'Asturies de les Lletres 2017 al qu'optaben 38 candidatures de 23 países ente les que taben les del español Javier Marías y el francés Michel Houellebecq.

Zagajewski (Lwów, 1945), disidente del réxime comunista que prohibió la so obra en Polonia, exilióse en 1982 dos décades n'Alemaña, Francia y los Estaos Xuníos y ye autor de poemarios como "Ir a Lviv" (1985), "Tierra de fuego" (1994) y "Retorno" (2003) y d'ensayos como "Solidaridad y soledad" (1968) y "En defensa del fervor" (2002).

Candidatu al Nobel dende 2007, el poeta premiáu, que se confiesa almirador de la obra d'Antonio Machado, conviértese asina nel primer autor en llingua polaca qu'algama'l Premiu Princesa d'Asturies de les Lletres nes sos 37 ediciones.
La so candidatura foi propuesta polos escritores John Banville y Richard Ford, premiaos en 2014 y 2016, y pol Premiu Príncipe d'Asturies de les Artes 2001, Krzysztof Penderecki, y respaldada polos investigadores Juan Ignacio Cirac y Roy Glauber (Nobel de Física 2005) asina como por Adam Michnik, redactor xefe de Gaceta Wyborcza, y pol Institutu Polacu de Cultura de Madrid.

Graduáu en Filosofía y Psicoloxía pola Universidá Jagiellonica, en Cracovia, l'autor premiáu ta inxertu na nomada Xeneración del 68 o de la Nueva Fola, formada por autores decidíos a comprometese políticamente nes sos obres, como Kornhauser, Kipska, Krynicki o Baranczak.

Pa esti grupu Zagajewski creó los sos dos principales lemes: "Powiedz prawde" (Di la verdá) y "Mow wprost" (Fala claro) enantes d'exiliase dos décades pa tornar en 2002 a Cracovia, onde vive y ye coeditor de la revista lliteraria "Zeszyty literackie", que se publica en París.

Na década de los setenta xuntóse al grupu de disidentes de Cracovia, "Teraz" (Agora), dos años enantes d'asoleyar el so primer poemariu, Komunikat, al que siguió la novela "Cieplo zimno" (Caliente y fríu) a la vez que difundía les sos idees na revista clandestina "Zapis", unu de los principales medios de la oposición democrática polaca.

Tres asoleyar "Sklepy miesne" (Carniceríes), la persecución del réxime comunista llevólu al exiliu en París, onde espublizó la novela "Cienka kreska" (Trazu) y el poemariu "List. Oda do wielosci" (Lletra. Oda a la pluralidá), y nel so ensayu siguiente, "Solidarnosc i samotnosc" (Solidaridá y soledá), l'autor amosó les sos tesis del compromisu políticu de los escritores.

Tres viaxar en 1988 a los Estaos Xuníos pa trabayar como profesor nel Creative Writing Program de la Universidá de Houston, col poemariu Plótno (1990) evolucionó a una contemplación poética lloñe de la combatividá de les sos primeres obres.

"La poesía ta n'otra parte, más p'allá de les lluches partidistes de darréu, y inclusive más p'allá de la rebelión -entovía la más xustificada- escontra la tiranía", afirmó entós.
Ente los sos temes recurrentes tán la nueche, los suaños, el tiempu, la eternidá, el silenciu y la muerte dientro d'una poesía que, a xuiciu de so, tien que conxugar "ironía y éstasis" y qu'obliga tamién al poeta a ser dalguién "consciente de la historia".

Esti premiu, el sestu Premiu Princesa d'Asturies que se falla nesta edición, recayó tamién, ente otros, en John Banville, Antonio Muñoz Molina, Leonard Cohen, Paul Auster, Claudio Magris, Arthur Miller, Doris Lessing, Augusto Monterroso, Günter Grass, Carlos Fuentes, Mario Vargas Llosa, Juan Rulfo o Richard Ford, que lu ganó en 2016.

Tres conocer el premiu, Zagajewski amosó güei la so satisfacción pola "inesperada" anuncia que-y supunxo la concesión del Princesa d'Asturies de les Lletres, procedente del "reinu de Cervantes y d'otros grandes poetes y escritores".

"Ye un gran honor recibir esti magníficu premiu procedente del reinu d'España, que ye tamién el reinu de Cervantes y d'otros grandes poetes y escritores. Un poeta trabaya en soledá, pero de sópitu apaez una anuncia inesperada. ¡Gracies!", señala nuna declaración difundida pola Fundación Princesa d'Asturies.