Los reis vuélquense con Poreñu, Pueblu Exemplar 2017

El rei allaba la convivencia de los pueblos y "la unión por un proyectu común"

El rei aseguró güei que los pueblos pequeños espardíos per España exemplifiquen la convivencia ente vecinos y amuesen "la necesidá de compartir y de xunise pa realizar un gran proyectu común".

Felipe VI, xunto cola reina Letizia, completó güei la so visita de tres díes a Asturies na aldea de Poreñu, galardonada esti añu col Premiu al Pueblu Exemplar, dempués de presidir ayeri la ceremonia de los Premios Princesa d'Asturies.

El xefe del Estáu allabó que Poreñu, allugáu nel conceyu de Villaviciosa y onde vive poco más d'un centenar de persones, caltenga los principios de vecindá "de forma exemplar".

"Los pueblos afirmen l'alma y enguapecen el paisaxe d'Asturies resaltando la bayura de la so diversidá. Y esto asocede equí, pero tamién en munchos llugares d'España", sorrayó'l Rei nes sos palabres énte los paisanos y les autoridaes, encabezaes pol presidente asturianu, Javier Fernández.

Según don Felipe, "en pocos llugares como nun pueblu pequeñu pue vese tan claramente'l fundamentu de la vida y la convivencia en sociedá, la necesidá de compartir, de xunise pa facer un gran proyectu común".

De Poreñu, el Rei destacó que "ye, primero de too y sobre manera, comunidá", que "funde los sos raigaños no mas primero de la hestoria y que fai de la unión vecinal la so principal bandera".

El conceyu de Villaviciosa tien como fitu hestóricu que foi onde Carlos I desembarcó al triar per primer vegada territoriu español en 1517, fai agora 500 años, poco primero de la so coronación.

"Un fechu que tenemos que recordar pa entender meyor los fondos raigaños de la nuesa Nación. Sobre manera, nestos tiempos que vivimos", remarcó don Felipe n'alusión al "inalmitible" intentu de secesión en Cataluña, como lo definió ayeri nel so discursu nel Teatru Campuamor.

El percorríu pela aldega, engalanada en munchos de los sos balcones con banderes d'España y Asturies, allargóse más d'una hora, mientres los Reis respondieron al ciñu de la xente estrechando les sos manos y faciéndose semeyes.

Tres la bienvenida al son de gaites y tambores, don Felipe y doña Letizia almiraron primero dalgunos de los más de trenta horros de madera pel pueblu y pararon nun taller pa conocer la técnica de la taracea.

Nel 'mercau' solidariu, vieron dalgunos de los productos de la tierra y, de siguío, parolaron con participantes na tradicional sestaferia, una iniciativa empobinada a faer trabayos en favor de la comunidá una vegada al mes de forma desinteresada.

Tamién s'averaron a una parexa de vaques, onde'l Rei charró de volao col so propietariu, al que-y preguntó'l nome de les reses, Cubana y Pastora.

Pa dexar buelga de la so estancia, don Felipe y doña Letizia tomaron una pala pa llantar un pumar enantes d'afayar la placa conmemorativa.

La visita quixo ser, en boca del rei, "un homenaxe a los héroes cotidianos" que supieron conxugar les costumes centenaries con "la irrenunciable busca del progresu, ensin escaecer que los bienes materiales nun son abondos pa dar sentíu a les sos vides".