Webcams
Buscar
"Como dixo mio padre a la mio edá y equí mesmu, sedrá un día que llevaré siempres no más fondero del mio corazón"
La princesa Leonor afirmó, nel primer discursu que pronuncia, que la so condición d’heredera de la Corona "comprométela cola entrega y l’esfuerzu de servir a España y a los españoles", un retu qu’asume con "responsabilidá" y "mui honrada".
Leonor de Borbón citóse esti vienres cola historia al intervenir per primer vegada na ceremonia de los Premios Princesa d’Asturies nel Teatru Campoamor d’Uviéu colos reis y la so hermana, la infanta Sofía, un momentu que dixo que sedrá "inolvidable".
"Güei ye un día mui importante na mio vida qu’esperé con muncha ilusión", afirmó la princesa, que pronunció’l so primer discursu con 13 años, la mesma edá cola que s’estrenó so padre, Felipe VI, en 1981 nel mesmu llugar.
La Princesa lleó’l so discursu, interrumpíu tres vegaes poles ovaciones de los asistentes a la ceremonia, dende la mesa presidencial onde enantes dio, tras recibilos de so padre, los diplomes acreitativos a los premiaos.
Dempués de felicitar n’inglés a los premiaos, Leonor de Borbón, que l’añu pasáu fizo la so primer visita oficial a Asturies, enfatizó qu’esti territoriu da nome al títulu d’heredera al tronu y qu’adoptó’l 19 de xunu de 2014 cuando so padre foi proclamáu.
"Fágolo con responsabilidá y siéntome mui honrada con ello. Ye un títulu que me compromete cola entrega y l’esfuerzu de servir a España y a los españoles. En mio casa, les palabres España y Asturies siempres tán xuníes cola mesma fuerza coles que les xuntó la historia. Asina lo siento nel mio corazón", dixo.
