Emotivu homenaxe en Llanes a Javier Ardines

IX pide xusticia y evitar especulaciones sobre la muerte del edil

Dellos centenares de persones sumáronse güei al homenaxe convocáu por IX en memoria del so conceyal nel Ayuntamientu de Llanes, Javier Ardines, asesináu'l pasáu xueves cabo casa, y pal que la coalición pidió "xusticia" y evitar especulaciones sobre l'orixe de l'agresión.

Un crespón negru y un retratu d'Ardines, de 52 años, presidió'l minutu de silenciu celebráu ante la sede de la corporación llanisca, onde l'ex-coordinador xeneral d'IX n'Asturies y amigu personal del fallecíu, Manuel González Orviz, dio llectura a un comunicáu glosando la so figura.

Al actu fueron los miembros de la corporación municipal asina como la delegada del Gobiernu n'Asturies, Delia Losa; el coordinador d'IX-Asturies, Ramón Argüelles, y el voceru parllamentariu, Gaspar Llamazares, ente otros dirixentes de la coalición.

Otres fuerces polítiques quixeron sumase tamién al homenaxe cola presencia del secretariu xeneral de la Federación Socialista Asturiana (FSA-PSOE), Adrián Barbón, y del voceru de Podemos nel parlamentu asturianu, Enrique López, y de la diputada de la formación morada Paula Valero.

Pese a almitir, visiblemente emocionáu, que nun día como güei "falten les palabres" pa espresar el "gran vacíu" que dexa Ardines, González Orviz dixo que'l conceyal d'IX "coló", pero non asina "tol calor que pudo tresmitir nin la so enerxía y la so capacidá pa facer un mundu meyor entamando pol so entornu".

L'ex-dirixente de la coalición recordó qu'Ardines foi "un home xustu y buenu" nes sos facetes como padre, güelu, marineru y pescador y na de políticu "íntegru, nítidamente d'izquierdes" y comprometíu cola tresparencia "y na llucha escontra la corrupción y el caciquismu en Llanes.

"Nun hai espertar posible pa esta pesadiella", dixo Orviz que pidió, por respetu a la memoria d'Ardines, "non especular coles causes d'una muerte absurda" yá que, conseñó, "nun hai razones pa que naide mate a naide y nuna sociedá sana les muertes violentes fáense incomprensibles".

Tres facer un llamáu a aclarar bien llueu'l crime y y pidir que se caltenga la calma a la espera del desarrollu de les investigaciones por que "especular namás lleva a sumar más dolor al dolor", Orviz alvirtió de que "la instigación al odiu y a la falsedá ye'l caldu de cultivu pa que se produzan estos fechos".

"Queremos conocer tola verdá, necesitamos xusticia y un castigu exemplar a los culpables", concluyó González Orviz enantes de que los concentraos dieren un llargu aplausu primero que dende'l balcón del Ayuntamientu de Llanes s'interpretara'l cantar "Gallo rojo, gallo negro", al cargu de la cantante Marta Elola y del guitarrista Douglas Anderson.

Otra llarga ovación de los asistentes cerró'l cantar compuestu por Chicho Sánchez Ferlosio, unu de los favoritos del conceyal asesináu, qu'alvierte nuna de les últimes estrofes que "no se rinde un galll rojo más que cuando esta ya muerto".

Pela so parte, la Guardia Civil sigue pescudando datos p'aclariar l'asesinatu del edil, que morrió tres recibir dellos golpes na cabeza, y qu'ayeri yá tuvo un homenaxe de los compañeros na Cofradía de Pescadores de Santa y de los sos vecinos na parroquia rural
onde residía.

El cuerpu d'Ardines atopóse a unos centenares de metros de la vivienda en Belmonte de Pría, sobre la calzada que daba accesu al inmueble, y la so furgoneta, parada pero col motor prendíu, atopada a 70 metros del calabre.

Na zona la Guardia Civil atopó amás tres valles d'obres tiraes xunto a la calzada polo que se baraxa la hipótesis de que daquién les colocara enantes col oxetivu de que'l conceyal se viera obligáu a baxar del vehículu pa siguir circulando, momentu nel que socedería l'agresión.

Ardines comentara díes enantes que, cuando diba de madrugada al cai de Llanes -a unos 20 kilómetros- pa embarcarse nel pesqueru que patroneaba, atopó una valla que torgaba circular pela calzada y que tuvo que quitala.