Armando Paesa, una vida ente la fábrica de L’Algodonera

Siendo entá mui neñu, Armando Paesa llegó cola so familia a Xixón dende la so Zaragoza natal. So padre, un profesional del sector testil, alcontrare trabayu en L’Algodonera, una de les munches empreses que daben forma al entramáu industrial de La Calzada.

A los tres meses fina so madre. Torna un tiempu a Zaragoza, pero dempués de que so padre casare otra vuelta, torna definitivamente a Xixón pa pasar el restu de la so infancia nuna de les cases que la compañía tenía dientro de les muries de la fábrica.

Yeren tiempos onde’l trabayu abondaba a la solombra d’empreses paternalistes, pero tamién yeren tiempos de pluriempléu pa salvar sueldos pequeños y de silenciu énte los abusos empresariales.

Y sicasí, aquelles yeren islles de prosperidá arrodiaes de miseria. Los que nun tuvieron la suerte d’alcontrar trabayu nelles, taben condenaos a una vida de penes, qu’Armando recuerda bien.

Finalmente, en 1966 zarra L’Algodonera. Les empreses de La Calzada fueron cayendo como pieces de dominó. Ensidesa vieno a salvar, en parte, l’atapecer industrial de la zona oeste de Xixón.

D’esi pasáu industrial yá namás sobreviven dalgunos resclavos y los recuerdos de los que como Armando lo vivieron en primera persona.