Canga acusa a Pumares de "dinamitar" un pactu ente PP y Foro pa les autonómiques

El popular diz que foi más respetuosu con Foro que Foro con él, pero ufiérta-y la mano pa cooperar

El candidatu del PP a la Presidencia del Principáu, Diego Canga, ufiertó-y la mano a Foro pa un escenariu de "entendimientu" y "cooperación” dempués d'acusar al so secretariu xeneral, Adrián Pumares, de "dinamitar" un posible pactu pa concurrir n'alianza a les autonómiques a pesar d’ufierta-y un puestu ente los cinco primeros de la llista.

"Si nun hubo alcuerdu con Foro tien nome y apellíos. Ye la parte asturianista radical de Foro la que nun quixo un alcuerdu", dixo esti martes Canga en rueda de prensa na qu'esplicó que'l 9 de febreru propunxo nuna xunta a la presidenta de Foro, Carmen Moriyón, un alcuerdu d'alianza pa les autonómiques que Pumares refugó argumentando que diben algamar un "resultáu estraordinariu" y que nun los necesitaben.

A la vista de los resultaos electorales, Canga señaló que les previsiones de Foro fueron "errónees" y "escesivamente positives" y “foi castigáu" cola pérdida de 15.000 votos.