El convói d'ayuda que salió ayeri d'Asturies ta yá n'Alemaña

El tráiler quier llegar esti llunes a la llende con Ucraína

El camión con ayuda humanitaria pa Ucraína que salió ayeri d’Asturies fai un par d’hores cruzó la llende alemana y ta agora na contornada de Friburgo, nel oeste del país. 

El tráiler, con 25 tonelaes de ropa, comida y material sanitario, quier llegar a la llende de Polonia con Ucraína esti llunes. 

Ellí distribuiráse ente los afectaos.

Siguiéndolos de cerca sigue l’equipu de TPA Noticies. Tán a menos de 1.500 kilómetros d’España, ye dicir prácticamente a metá de camín.

Avancen lentamente porque’l tráiler cedíu pola empresa IFT lleva la so carga completa y eso fai que circule a una velocidá media d’unos 70 ó 75 kilómetros per hora.

Cunta, eso sí, cola ventaya de la lona que se fizo pa la ocasión y qu’identifica la carga como ayuda humanitaria.

Esto posibilita que puea circular peles autopistes un día como güei, domingu.

Pela tarde avanzarán per Alemaña, al traviés de Nuremberg y dirección a Dresden.

Un últimu datu, a les 16:00 salen d’Asturies otros tres camiones col material donao polos asturianos.