La Fiscalía pide cinco años de prisión pa Villa por apropiación indebida

Pide tres años pa Pedro Castillejo

La Fiscalía d'Asturies pide nel so escritu d'acusación cinco años de cárcel pal ex-secretariu xeneral del SOMA-UXT José Ángel Fernández Villa, al qu'acusa d'un delitu siguíu d'apropiación indebida, amás d'una indemnización al sindicatu mineru de 434.158 euros pol dineru apropiao.

El Ministeriu Públicu pide tamién una pena de tres años y mediu de prisión pal ex-secretariu de la Fundación pa la Formación, la Investigación, la Documentación y los Estudios Sociales (INFIDE) Pedro Castillejo pol mesmu delitu y una indemnización de 119.434 euros.

La titular del xulgáu d'instrucción númberu 2 d'Uviéu cerró'l pasáu día 12 la instrucción d'esta causa pa la que'l fiscal pidió agora l'apertura de xuiciu oral.

Según el fiscal, Fernández Villa exercía una "posición de dominiu absolutu" del sindicatu mineru y yera quien tomaba toles decisiones, hasta les de la más mínima relevancia, y qu'él foi tamién quien decidió la creación del INFIDE y poner a Castillejo al mandu d'esi organismu.

Fernández Villa, siempre según l'escritu del fiscal, "aprovechando la so posición d'absolutu control de la entidá ideó un plan destináu a esviar los fondos del sindicatu al so patrimoniu personal" qu'ente 1989 y 2010 dio-y 434.158 euros.

En concreto, ente los años 1989 y 2001 cobró los cheques nominales colos qu'Hunosa pagaba al sindicatu les dietes por asistencia de sindicalistes al comité intercentros y que sumaben cerca los 244.000 euros.

En decidiendo en 2001 la empresa estatal minera facer esos pagos por tresferencia bancaria, Fernández Villa, según el ministeriu públicu, alcordó que los ingresos nun se fixeren na cuenta del SOMA-FITAG-UXT, sinón n'otra de nome asemeyáu (SOMA) "na que caltenía un control absolutu" y qu'usó como una cuenta personal.

La Fiscalía asegura amás que l'ex-líder mineru "usó'l patrimoniu del SOMA como una cuenta personal de gastos" na que, amás de los xustificaos pola so actividá de secretariu xeneral, amestó otros puramente personales.

Asina, amás de que-y pagaben dietes por kilometraxe y comíes, cobró gastos incompatibles de carburante, multes que-y punxeren, factures de caltenimientu de coches, seguros, resguardos d'aparcamientu o periódicos ente "otros conceutos de mui altu importe y carentes de toa xustificación".

L'acusáu tamién fixo numberoses compres "ensin xustificación dalguna" con cargu a les tarxetes de creitu del sindicatu, coles que pagó puros, sombreros, perfume, flores, centros dietéticos, maletes, productos de farmacia y parafarmacia, llibros, discos o conocíos y numberosos restauranes.

En total, según caltién la Fiscalía, pagó coles tarxetes ente 2001 y 2012 más de 73.000 euros de gastos personales y sacó cerca de 13.800 euros en metálico pal so esfrute personal

El fiscal considera tamién que pa mercar en 2001 un Mitsubishi Montero usó otros 33.520 euros y que cinco años dempués volvió a cargar al sindicatu otros 52.100 euros pa pagar, ente otros gastos, otru Mitsubishi Montero compráu pal so usu particular.

"Esti vehículu foi usáu y esfrutáu dafechu pol acusáu inclusive tres el so cese como secretariu xeneral", caltién l'escritu d'acusación nel que s'alvierte de que Fernández Villa tenía nel sindicatu pal so usu un Audi A4 pol que se pagaron 16.700 euros de más que tamién fueron a parar a la so cuenta.

Tocante a Castillejo, el fiscal considera que "aprovechando la so posición d'absolutu control de la entidá" fizo una serie d'operaciones carentes de rellación cola actividá de la fundación.

Eses operaciones fueron reintegros n'efectivo, pagos en "innumberables" restauranes, farmacies, tiendes o compañíes aérees y xubieron ente los años 2004 y 2013 a 119.434 euros.

El SOMA-UXT presentó en setiembre de 2015 una querella contra Villa reclamando la devolución de 360.000 euros, que dempués s'ampliaron hasta 420.000 euros, y otra escontra Castillejo na que reclamaba la devolución de más de 70.000 euros.

La familia de Fernández Villa, que tamién ta siendo investigáu pola Fiscalía Anticorrupción pol orixe de los 1,4 millones d'euros que regularizó tres la última amnistía fiscal, pidió apocayá que seya incapacitáu, pidimientu que ta siendo estudiáu pola Fiscalía.

Hasta agora, la Sección Tercer de l'Audiencia tornó tolos recursos d'apelación que la defensa de Fernández Villa presentara pa evitar que declarara aludiendo a la supuesta enfermedá mental que sufre'l procesáu.