La Guardia Civil recueye muestres d’ADN a los allegaos d’Ardines, según l’entornu

L’agresor o agresores namái tuvieron dos posibles víes de fuxida

Según fontes del entornu de Javier Ardines, la Guardia Civil ta recoyendo muestres d’ADN ente los familiares, vecinos y amigos del conceyal pa poder dempués cotexales colos resultaos qu’algamen de los análisis que tán faciendo nel llaboratoriu.

El so entornu insiste en qu’apaecieron restos d’ADN d’otres persones nes manes de la víctima.

Mentanto, sigue avanzándose na investigación. La Guardia Civil rastrexó les dos posibles víes de fuxida del agresor o los agresores dende’l llugar nel que se cometió l’asesinatu: el camín asfaltáu que lleva a la carretera de Llanes y unu, en sen contrariu, de piedra qu’atraviesa la viesca hasta Pesa de Pría.

Per esta vía, namái pue pasase andando o en touterrén, anque non per tol percorríu. Desemboca nel cementeriu y na Ilesia de Pesa de Pría. Dicen los del pueblu que ye un llugar nel que malapenes se ve dalgún pelegrín. Una zona na que namái pue orientase, afirmen, dalguien que conoza bien esi llugar.

La Guardia Civil peinó’l terrén y recoyó y sacó semeyes a cualquier pista que-yos puea llevar a prindar al responsable o responsables del crime. Enagora, nun s’atopó l’oxetu contundente col que supuestamente Javier Ardines foi golpiáu.