Webcams
Buscar
La Xunión Europea, Premiu Princesa d'Asturies de la Concordia
El xuráu destaca los sos valores de llibertá, derechos y solidaridá
La Xunión Europea, el proyectu d'integración política y económica xurdíu tres la Segunda Guerra Mundial del que formen parte anguaño veintiocho países a la espera de la salida del Reinu Xuníu, foi premiada güei col Premiu Princesa d'Asturies de la Concordia 2017.
El galardón, al qu'aspiraben veintiocho candidatures vinientes de dieciséis países, ye l'últimu en fallase de la XXVII edición de los Premios Princesa d'Asturies, que sedrán entregaos el mes de ochobre viniente nel Teatru Campoamor d'Uviéu nuna ceremonia presidida polos reis d'España.
El xuráu decidió dar esti premiu a la Xunión Europea, cuando se cumplen sesenta años de la robla del Tratáu de Roma, pola so collaboración nel inxerimientu y difusión nel mundu de "valores como la llibertá, los derechos humanos y la solidaridá".
Estos valores, destaca l'acta que lleó esti mediudía'l presidente del xuráu y xefe del Executivu asturianu, Javier Fernández, "proyecten esperanza pal futuru, en tiempos d'incertidume, proponiendo un exemplu de progresu y bienestar".
Amás, el xuráu punxo en valir el fechu de que la XE "algamó'l más llargu períodu de paz de la Europa moderna"
La XE recibe arguyosa un premiu que-y llega nel so momentu más difícil
La Xunión Europea (XE) recibió güei con arguyu'l Premiu Princesa d'Asturies de la Concordia, un galardón que llega nunu de los sos peores momentos económicos y políticos, en plenu entamu de la negociación del "brexit".
Los representantes de les instituciones europees consideraron güei un "reconocimientu y honor" que la Xunión fuera premiada.
"Aceptamos en nome de la Xunión Europea esti prestixosu galardón y estimamos la reconocencia y el gran honor que nos llega d'España", dixeron los presidentes del Conseyu Européu, Donald Tusk; del Parlamentu Européu (PE), Antonio Tajani, y de la Comisión Europea (CE), Jean-Claude Juncker, nun comunicáu conxuntu.
Los representantes europeos sorrayaron que'l galardón "supón una reconocencia escepcional nun añu marcáu pol 60 aniversariu del Tratáu de Roma".
