La plantiya de Saint-Gobain refuga'l plan de recolocaciones y baxes de la empresa

Podemos pide cerrar files pa sofitar a los trabayadores

Sestu día de fuelga en Saint-Gobain n'Avilés y les protestes de los trabayadores nun paren, porque nun acepten la propuesta de la empresa de recolocar a trabayadores y prexubilaciones como opción pa llevantar l'ERE.

La dirección de Saint-Gobain propunxo a los sindicatos un plan de recolocaciones de 67 puestos n'otres fábriques del grupu, baxes voluntaries y prexubilaciones a partir de los 60 años, al entender que la cayida de producción na llinia de automoción nun tien calter coxuntural sinón permanente.

Los trabayadores de la planta d'Avilés piden un plan qu'asegure'l futuru de la factoría al llargu plazu.

Los trabayadores siguen a les puertes de la planta d'Avilés, protestando a la entrada y salida de los directivos de la compañía.

El voceru de Podemos na Xunta Xeneral del Principáu, Rafael Palacios, pidió esti vienres n'Avilés, frente a la fábrica de Saint-Gobain, cerrar files con una declaración institucional en sofitu de los trabayadores “porque si nun se llucha pol futuru industrial d'Asturies, nun lo vamos tener”.