Natalio Grueso va siguir en prisión ensin fianza al esistir riesgu de fuga

El Colexu d'Abogaos d'Uviéu concéntrase en sofitu de los dos lletraos d'oficiu asignaos a Grueso

L'ex-director xeneral de la Fundación Niemeyer, Natalio Grueso, va siguir en prisión comunicada y ensin fianza hasta'l próximu llunes, fecha prevista pa la celebración del xuiciu pola so xestión al frente del centru cultural, al apreciar l'Audiencia Provincial la esistencia d'un riesgu real de fuga.

Esta midida cautelar foi adoptada pol tribunal de la Sección Tercera de l'Audiencia Provincial tres la celebración de la vista a la qu'asistieron la Fiscalía, les acusaciones particular y popular y el so nuevu abogáu defensor, Fernando Burgos.

Nel so autu l'Audiencia Provincial sorraya que, hasta'l so ingresu en prisión provisional el pasáu martes, l'acusáu "asitióse voluntariamente y en feches próximes a la celebración del xuiciu nuna situación que torgaba la so localización" al facilitar al tribunal la dirección de dos cases nes que nun vivía.

Con esos antecedentes, amiesta l'autu, "resulta más que probable que l'acusáu puea decidir nuna tercer ocasión sustraese definitivamente a l'acción de la xusticia" y qu'esi riesgu tien que conxurase adoptando la midida cautelar de prisión ensin fianza.

Na vista, la Fiscalía, que pide once años de cárcel pa Grueso de cara a la vista oral, pidió'l caltenimientu de la midida dempués de que l'acusáu negara que quixera sustrayese a l'acción de la xusticia y proclamó la so inocencia.

Amás, aseguró que vive del so trabayu como escritor y que tien enraigonamientu familiar y social n'Asturies.

Grueso ta encarceláu dende'l pasáu martes tres comparecer énte'l tribunal pa recoyer personalmente la notificación del xuiciu y les órdenes de busca y captura y posterior ingresu en prisión que decretara'l tribunal al tar en paraderu desconocíu, a pocos díes d'entamar la vista oral.

Los maxistraos dictaren un autu onde argumentaben que diera hasta dos cases distintes que nun se correspondíen "con nenguna suya", lo que torgó que se-y apurriera la citación pal entamu del xuiciu.

L'ex-director xeneral encara un pidimientu d'once años de cárcel, diez años d'inhabilitación y multa de 24.000 euros pola so supuesta autoría nes irregularidaes detectaes en relación a la emisión de factures falses o manipulaes.

Tamién lu acusen de delitos siguíos de malversación en concursu medial con falsedá, otru societariu y un terceru d'insolvencia punible.

Nel procedimientu tán personaos como acusaciones particulares el partíu Foro, que pide 13 años de prisión, y la Fundación Centru Cultural Internacional Óscar Niemeyer, que pide penes que sumen 15 años y 6 meses.

Xunto a Grueso van ser xulgaos l'axente de viaxes J.M.V.R., quien encara un pidimientu fiscal de 8 años, y l'abogáu José Luis Rebollo, ex-secretariu de la Fundación Niemeyer, pa quien el fiscal pide una pena de dos años y tres meses de prisión.

Pa la ex-esposa de Natalio Grueso, J.P., el fiscal pide dos años y mediu de prisión y pal ex-xefe de producción del Centru Niemeyer, Marc Marti, pide un añu y mediu de prisión.

El Colexu d'Abogaos d'Uviéu concéntrase en sofitu de los dos lletraos d'oficiu asignaos a Grueso

Concentración de sofitu a los dos abogaos d'oficiu designaos pa la defensa de Natalio Grueso.

La Xunta de Gobiernu del Colexu d'Abogaos d'Uviéu aprovechó la comparecencia pa determinar si Grueso sigue o non en prisión, p'amosar el so respaldu a los lletraos.

A primer hora, concentráronse énte'l xulgáu. Cuestionen l'actitú de l'Audiencia. Consideren que'l señalamientu del xuiciu, previstu pal próximu llunes, tendría que ser aplazáu al nun tener tiempu abondu los lletraos d'oficiu pa preparar el casu.