Ayuntamientos asturianos recuerden en silenciu al edil Javier Ardines

Repulsa énte la muerte del conceyal y solidaridá cola familia

Cientos de conceyales, cargos públicos, trabayadores municipales y ciudadanos de dellos conceyos asturianos guardaron güei un minutu de silenciu en recuerdu del conceyal d’IX de Llanes Javier Ardines, asesináu va una selmana al recibir dellos golpes na tiesta cuando salía de so casa pa dir trabayar col barcu col que se ganaba la vida.

La Federación Asturiana de Conceyos (FACC) ficiere un llamamientu pa que frente a los 78 consistorios del Principáu se celebraren concentraciones al mediudía pa espresar la so repulsa énte la muerte del conceyal y amosar la so solidaridá cola familia.

L’Ayuntamientu de Llanes, del que formaba parte’l conceyal asesináu dende va tres años, foi’l primeru en guardar güei un minutu de silenciu en recuerdu del edil.

Foi na celebración d’un plenu de calter estraordinariu celebráu a les 9:30 y qu’entamó en silenciu y cola siella qu’ocupaba davezu Ardines como conceyal de Mediu Rural, Pesca y Personal vacia.

La corporación tamién se sumó al minutu de silenciu convocáu pola FACC al mediudía que, nel casu d’Uviéu xuntó a delles decenes de persones y políticos.

Ente ellos taba l’alcalde de la capital, el socialista Wenceslao López, el coordinador xeneral d’IX d’Asturies, Ramón Argüelles, y al portavoz parllamentariu de la coalición, Gaspar Llamazares.

Pal coordinador d’IX, fai falta esclariar cuanto enantes un crime que se dio con tanta maldá , pero treslladar tamién el máximu ciñu a la familia y a los compañeros de la agrupación de Llanes.

"Nun sé si tien que ver cola política o con otres coses. Hai que dexar trabayar a los profesionales", señaló Argüelles, que saludó l’inxerimientu a la investigación de la Unidá Central Operativa de la Guardia Civil porque cuantos más profesionales y meyores investigadores trabayen nel casu "enantes se sabrá lo que pasó".

En Xixón, l’alcaldesa Carmen Moriyón participó tamién nuna concentración qu’axuntó a más de mediu centenar de persones y a representantes de los seis grupos municipales, ente ellos Aurelio Martín, portavoz d’IX, que treslladó’l so deséu de que s’esclarie cuanto enantes tolo que cinca a esti crime.

N’Avilés, la conceyala de la coalición Carmen Conde lleó un manifiestu nel qu’ensalzó la trayectoria política d’Ardines y pidió igualmente un esclarecimientu bien llueu del asesinatu.

Estes manifestaciones de repulsa amiéstense a les celebraes nos dos últimos díes en Llanes, onde vecinos de la capital del conceyu y de Nueva, asina como de marineros y pescadores del so cai, concentráronse en protesta pol crime del edil.