La Guardia Civil sigue atropando testimonios ente los vecinos de Javier Ardines

Cúmplese una selmana del asesinatu del conceyal

La Policía Xudicial de la Comandancia de Xixón y la UCO siguen trabayando pa esclariar el crime de Javier Ardines. La Guardia Civil tuvo percorriendo otra vuelta les cases de la zona de Pría y falando colos vecinos.

L’oxetivu ye alcontrar cualquier pista o detalle qu’ayude a plantegar nueves llinies d’investigación. Güei cúmplese una selmana del asesinatu del conceyal.

Cronoloxía

Seis de la mañana d’un xueves festivu en Llanes, San Roque. Javier Ardines sal de so casa, en Belmonte de Pría, pa dir al cai a faenar col so barcu 'Bramadoria'. Malapenes percuerre 300 metros na so furgoneta cuando s’atopa con unes valles nel camín que-y torguen el pasu.

Col motor en marcha, baxa del vehículu pa quitales. Ye nesi momentu cuando’l so agresor o agresores péguen-y na tiesta con un oxetu contundente provocándo-y la muerte.

El so cadabre yera alcontráu hores dempués por un vecín de la zona. Taba nel suelu, más p’allá de les valles y a unos 70 metros del so coche.

Dende una vivienda de cerca aseguren qu’esa madrugada sintieron una conversación en voz alta que fizo que los perros lladraren.

L’autopsia confirmaba la muerte violenta del conceyal, de 52 años. Tres golpes na tiesta y señales de que Javier Ardines intentó defendese del ataque.

Rogelio Marotías nun sedrá’l sustitutu d’Ardines al arrenunciar al so acta de conceyal

El responsable cimeru de CCOO nel Oriente, Rogelio Marotías, arrenuncia al so acta de conceyal y, poro, nun va sustituyir a Javier Ardines nel Ayuntamientu de Llanes.

L’acta pasa enagora a manos de Priscila Alonso, númberu 3 nes llistes d’Izquierda Xunida de Llanes nes últimes elecciones municipales.

El sindicalista abandonare Izquierda Xunida cuando Ardines entró nel gobiernu llaniscu cola conceyalía de Sableres. IX de Llanes entovía nun convocó una asamblea pa decidir quien sedrá’l sustitutu del edil asesináu.