L’hermetismu arrodia la investigación del edil d’IX asesináu va un mes

Ardines foi asesináu a pocos metros de so casa en Llanes

La Unidá Central Operativa (UCO) de la Guardia Civil sigue con un gran hermetismu les investigaciones pa esclariar l’asesinatu del conceyal d’Izquierda Xunida de Llanes, Javier Ardines, del que güei se cumple un mes.

Axentes d’esta unidá especializada, con sede en Madrid, treslladáronse a Asturies como refuerzu al trabayu desendolcáu polos equipos de Policía Xudicial de Llanes y Xixón.

La investigación centra los sos esfuerzos, un mes dempués del crime, na localización del oxetu contundente col que l’autor o autores agredieron al conceyal que, según l’autopsia, presentaba al menos tres golpes na tiesta: na nuca, la cara y la frente.

Javier Ardines, de 52 años y padre de dos fíos, foi asesináu na madrugada del xueves, 16 d’agostu, a pocos metros de so casa, en Belmonte de Pría, nel conceyu de Llanes, na zona oriental asturiana.

El conceyal salió de so casa, al rodiu de les 06:00 de la mañana, na so furgoneta pa dir al cai de Llanes pa dir faenar na so barca, "Bramadoira", cola que se ganaba la vida, porque arrenunciare al so sueldu como conceyal.

Cuando malapenes circulare unos 300 metros, viose sorprendíu pola presencia de tres valles que la Guardia Civil cree que fueron colocaes en metá del camín vecinal pa face-y una emboscada y obligalu a baxar del coche pa quitales.

Dos hores más tarde, un vecín que pasiaba col so perru alcontró’l so cadabre tiráu en metá del camín rural y, a pocos metros, la so furgoneta qu’entovía seguía col motor prendíu y la puerta del conductor abierta.

El Xulgáu de Primer Instancia y Instrucción de Llanes fízose cargu de la instrucción del asesinatu y yá tien l’informe preliminar del Institutu de Medicina Llegal d’Asturies col resultáu de l’autopsia.

Nesti primer informe confírmase la muerte violenta del conceyal, según afitó un portavoz del Tribunal Cimeru de Xusticia d’Asturies (TCXA).

Axentes de la Guardia Civil atroparon les últimes selmanes muestres d’ADN ente familiares, vecinos y allegaos del conceyal asesináu, que tenía al so cargu les conceyalíes de Playes, Mediu Rural y Personal de Llanes.

El decanu del Colexu de Criminólogos d’Asturies, Faustino Brañas, esplicó que l’éxitu de los operativos de la UCO afítase sobre manera nel hermetismu con que los sos miembros trabayen, yá que forma parte del so funcionamientu internu nun compartir información coles unidades territoriales pa evitar filtraciones que puean entorpecer les investigaciones.

"El trabayu de mano ye acordonar la zona y facer una inspección ocular, hai que preservar les pruebes que se puean atropar nel mesmu llugar onde foi’l crime y algamar ADN de persones o materiales que pudieren tener rellación col crime pal so análisis en Madrid", aseguró Brañas.

El decanu comentó que la UCO asume la investigación de casos de difícil resolución y refuercen los llabores de les unidaes territoriales, siendo sobre maneta meticulosa nes sos inspecciones.

A los interrogatorios de vecinos, familiares o testigos amiéstase darréu una reconstrucción de les últimes 24 hores na vida de la víctima y dende ehí revísense les cámaras de seguridá, l’autopsia y confírmense o descarten les distintes víes d’investigación al traviés de los posibles móviles que pudieron desencadenar el crime pa la identificación y prindamientu darréu de los sos autores.