Pachín ye unu de los más veteranos actores y cantantes de Bimenes

El popular vecín de 89 años foi unu de los primeros asturianos qu'emigró al Reinu Xuníu

Anque nun los aparente, Pachín yá cumplió 89 años. Una vida qu'entamó en 1930 nesta casa de L'Acebal y que sigue, cuasi 90 años dempués, nel mesmu llugar.

Pero Pachín non siempres vivió nesta casa y, ello ye porque foi unu de los primeros asturianos qu'emigraron al Reinu Xuníu: en 1.968 allugóse nel Londres de Los Beatles, Los Rolling o The Who. Un cambéu de vida radical.

Llámase Herminio, pero toos lu conocen por Pachín, el nomatu de so güelu Francisco. Y ye unu de los más veteranos actores y cantantes de la rexón. Entá anguaño sigue coyendo'l coche pa ensayar o actuar col Coru Santa María de Lieres y col Teatru Pausa, les sos dos grandes aficiones.

La vida de Pachín, como la de la inmensa mayoría de los yerbatos de la so xeneración, tuvo marcada pola mina.

So tierra, en Mosquitera, pasó cinco años de la so vida hasta qu'una grave enfermedá fizo que cambiara esti oficiu pola construcción. Foi un momentu clave na so trayectoria vital, del que surdió una fonda fe cristiana que marcó'l restu la so vida. Por eso Pachín siempres va visitar a cualquier vecín o amigu que ta malu y nun falta en nengún funeral o veloriu. Ye la so filosofía de vida.

A Pachín volvieron anova-y el so permisu de conducir, y diz que mientres lo siga teniendo va siguir llevando la mesma vida. Una vida venceyada a les sos dos aficiones, y n'ayudar a los demás, que lu fizo merecedor d'un gran homenaxe de l'Asociación La Fontanina y de les dos agrupaciones culturales nes que participa. Porque en Bimenes, de Pachín, namás s'escuchen bones palabres.