Riopedre, condergáu a seis años de prisión y Otero a 10 pol Casu Renedo

Marta Renedo, condergada a nueve años de cárcel

L'Audiencia Provincial d'Uviéu condergó a 40 años y 3 meses de prisión a ocho de los 13 acusaos nel "casu Renedo", ente ellos l'ex-conseyeru socialista d'Educación José Luis Iglesias Riopedre y el so númberu dos nel departamentu, María Jesús Otero, a los qu'impunxo seis y nueve años y mediu años de cárcel, respectivamente.

El conteníu dafechu de la sentencia va apurrise a les partes el próximu xueves por cuenta del so volume, tamién conderga a la ex-funcionaria Marta Renedo Avilés (les sos iniciales formen l'acrónimu que dio nome a la investigación), a nueve años de prisión pola trama d'axudicación irregular de contratos a empreses.

L'Audiencia consideró que Riopedre, de 77 años y responsable de la Conseyería d'Educación nos socesivos gobiernos de Vicente Álvarez Areces, y Otero son culpables de los delitos de prevaricación en concursu con falsedá documental y fraude a l'alministración, amás de cofechu.

A Renedo (les sos irregularidaes dieron entamu a la investigación en 2010) condérguenla polos delitos de falsificación en documentu oficial en concursu medial con prevaricación y malversación de caudales públicos, amás del de cofechu

Amás, los cuatro empresarios xulgaos nel "casu Renedo", la mayor trama de corrupción xulgada hasta la fecha nel Principáu, fueron condergaos a un total de 15,9 años de prisión.

La mayor pena impuesta a estos empresarios correspuende a los xerentes d'Igrafo, Víctor Manuel Muñiz, y Almacenes Pumarín, Alfonso Carlos Sánchez, que tendrán que cumplir caunu seis años y mediu de prisión polos delitos de falsedá en documentu oficial en concursu medial con malversación de caudales públicos y de cofechu.

La sentencia, contra la que pue haber recursu énte'l Tribunal Supremu, tamién impón penes d'un añu y nueve meses de cárcel pa Maximimo Fernández, d'Asac Comunicaciones, y d'un añu pa José Azorín, de Nora Proyectos y Inxeniería.

L'Audiencia tamién considera culpable a un funcionariu de Mieres escontra'l que la Fiscalía nun presentara acusación anque namás-y impón una multa de 1.800 euros por cofechu, mientres qu'absuelve a los otros cinco procesaos, tamién trabayadores d'otros conceyos y de la Universidá d'Uviéu.

Amás de les penes de prisión, el fallu impón a los acusaos multes por un valir total de cuasi 6,8 millones d'euros.

Les de mayor cuantía fueron impuestes a María Jesús Otero, 2,5 millones d'euros, y a los empresarios Alfonso Carlos Sánchez y Víctor Manuel Muñiz, 1,9 y 1,5 millones, respectivamente, mientres que l'ex-conseyeru tendrá que pagar 400.000 euros y la ex-funcionaria Renedo 480.000 euros.

El fallu xudicial pol "casu Renedo" conocióse trece meses dempués de que rematara la vista oral -que cuntó con cuasi cuarenta sesiones y la declaración de más d'un centenar de testigos- y trescurríos más de siete años y mediu de la denuncia qu'anició la investigación.

Les primeres irregularidaes detectáronse a principios de 2010 na axudicación de contratos por parte de Renedo, que foi detenida en xineru de 2011 xunto a Iglesias Riopedre, que dimitió cinco meses enantes del so cargu alegando motivos de salú.

Al marxe de los posibles recursos énte'l Tribunal Supremu avanzaos yá por delles de les defenses, los lletraos de Riopedre y Oteru asumieron nel xuiciu que los sos veceros fueron imprudentes, pero ensin llevase un euru ilícitu, nel casu del primeru, y ensin cometer malversación, nel casu de la segunda, polo que pidieron la so absolución.

El xuiciu dio llugar amás a l'apertura d'una nueva causa tres la denuncia interpuesta pola Fiscalía dempués de que'l Principáu unviara un informe sobro supuestes irregularidaes nel material unviao a 87 colexos que facía medrar en cuatro millones d'euros el presuntu fraude cometíu por Riopedre, Otero, Muñiz y Sánchez.